8 Falgun, 2074 | 20 February, 2018 Tuesday


विनोद परिवर्तित 
४ माघ, सौल कोरिया ।

           नेपाली साहित्यको अन्तर्राष्ट्रियकरण हुनुपर्ने आवाज उठिरहेको बेला कोरियामा नेपाली तथा  कोरियन कविहरूबीच महत्त्वपूर्ण कविता कन्सर्ट हुने भएको छ । 
          नेपाल-कोरिया कल्चर सेन्टरको आयोजनामा यही माघ ७ गते (२१ जनवरी) कोरियाको थेजन शहर स्थित सगरमाथा होटलको हलमा आयोजना गरिने कविता कन्सर्टमा प्रमुख कोरियाली कवि र कोरियामा रहेका नेपाली कविहरू सहभागी हुनेछन् । नेपाली साहित्य र काव्य संस्कृतिलाई अन्तर्राष्ट्रिय स्तरमा पुर्‍याउन नसकिएको सवाल उठिरहेको बेला दुई देशबीच साहित्यका विविध आयाम बारे चर्चा गरिने र चर्चित कविहरूका कविता सुन्ने सुनाउने कार्यक्रम हुने सेन्टरका संस्थापक किम योङ ह्योले जानकारी दिनुभयो । साहित्यिक बहस र कन्सर्टले दुई देशबीच साहित्य विकास र विस्तारका साथै अनुवाद र भावानुवादका सम्भावनाको खोजी गर्न सघाउ पुग्ने उहाँको विश्वास छ । 
               अनेसास कोरियाले सह-आयोजकको भूमिका निर्वाह गर्ने उक्त कविता कन्सर्टमा कोरियाका चर्चित कविहरू किम जुन ते, पाक मङ गै, लि क्यु सिक, मुन चाङ गिल लगायत  एक दर्जन कविहरू सहभागी हुनेछन् भने नेपालको तर्फबाट प्रखर कविहरू बोनम प्रताप, जीवन खत्री,  प्रमोद सारंग, यल्जी विवश, सरोज सर्वहारा, सकुन आँसु , गोकुल थोकर, डि आर न्यौपाने, मणि भुषाल, गङ्गा बस्नेत, एकलव्य र मातृका नेम्बाङ सहभागी हुनेछन् ।
              दुई देशका कुल २४ कविहरू लगायत करिब ५० स्रष्टाहरू सहभागी रहने छलफल र कन्सर्टले नेपाली साहित्यका विविध विधा र मुलतः  कविताहरूलाई कोरियन भाषामा अनुवाद गर्ने एक ऐतिहासिक बाटो कोरिने सह-आयोजक संस्था अनेसास कोरियाका अध्यक्ष सारंगले बताउनुभयो । सोही अवसरमा कोरियाली कवि किम ह्यङ हो , कवि प्रमोद सारंग र मन्जु गुरुङद्वारा अनुवादित नेपाली  कविका कविताहरू समेत सार्वजनिक हुने बताइएको छ ।