2 Poush, 2074 | 17 December, 2017 Sunday

तीतोपाटी डटकम-इन्ट्याग्रिटी आइडल को चौथो संस्करण इन्ट्याग्रिटी आइडल नेपाल २०१७ को मनोनयनमा परेका पाँच जनाको नाम सार्वजनिक भएको छ।

कुवेतमा प्रथम श्रम-सहचारीको रुपमा आफ्नो सफल कार्यकाल सकाएर गएकी तथा हाल सामान्य प्रशासन मन्त्रालयका उपसचिव सृजना तिवारी पनि उक्त मनोनयनमा परेकी र उनलाई भोट गर्न कोड नं-५ प्रयोग गर्न सकिने छ।     

यस वर्षको उत्कृष्ट पाँचमा जिल्ला कृषि विकास कार्यालय काभ्रेमा कार्यरत कृषि प्रसार अधिकृत कृष्ण धिताल, बन विभाग बबरमहलमा सहायक वन अधिकृतको रुपमा कार्यरत सबनम पाठक, पञ्चदेव मावि, मान्म कालिकोटका गणित शिक्षक सबराज बम, मोरङ जिल्लाका सहायक प्रमुख जिल्ला अधिकारी शेष नारायण पौडेल र सामान्य प्रशासन मन्त्रालयका उपसचिव सृजना तिवारी हुनुहुन्छ । 

अख्तियार दुरुपयोग अनुसन्धान आयोगका भुतपूर्व प्रमुख आयुक्त सूर्यनाथ उपाध्याय संयोजक रहेको निर्णायक समितिमा नेपाल सरकारका भुतपूर्व सचिव जिवनप्रभा लामा, नेपाल प्रशासनिक प्रशिक्षण प्रतिष्ठानका कार्यकारी निर्देशक पुण्य प्रसाद न्यौपाने र पूर्व विज्ञान तथा प्रविधी मन्त्री गणेश शाह रहेको निर्णायक मण्डलले मनोनयमा परेका मध्येबाट उत्कृष्ट पाँच जनाको नाम चयन गरेको आयोजक संस्था एकाउन्टबिलिटी ल्याब का प्रमुख नारायण अधिकारीले जानकारी दिनुभयो । 

नागरिकप्रति सरकारी कर्मचारीलाई जवाफदेही बनाउने उदेश्यले सन् २०१४ देखि इन्ट्याग्रिटी आइडलको शुरुवात गरिएको थियो । सन् २०१४ मा पाँचथरका तत्कालीन जिल्ला शिक्षा अधिकारी ज्ञानमणि नेपाल इन्ट्याग्रिटी आइडल हुनुभएको थियो भने सन् २०१५ मा गुल्मीका तत्कालीन प्रमुख जिल्ला अधिकारी प्रदिपराज कणेल विजेता  हुनुभएको थियो । त्यसै गरेर सन् २०१६ को विजेता शिद्धबाबा मावि गुल्मीका प्रधानाध्यापक डोरविक्रम श्रीस हुनुहुन्थ्यो । नेपालबाट सुरु भएको यो अभियान चौथो संस्करणसम्म आइपुग्दा, लाइबेरिया, पाकिस्तान, माली, नाइजेरीया र दक्षिण अफ्रिका लगायतका देशमा  विस्तार भैसकेको अधिकारले बताउनुभयो । 

इन्ट्याग्रिटी आइडलका लागि १५ जनवरी २०१७ बाट चार महिनाका लागि मनोनयन खुला गरिएको थियो । जस अन्र्तगत देशका ७१ जिल्लाबाट १ हजार २० वटा मनोनयन प्राप्त भएका थिए । देशभरबाट अनलाई, सामाजिक सञ्जाल तथा विभिन्न सञ्चार माध्यम तथा युवा स्वयंसेवक परिचालन गरेर मनोनयन आव्हान गरिएको थियो । इन्ट्याग्रिटी आइडलले तय गरेको पूर्व निर्धारित मापदण्डलाई आधार बनाएर विभिन्न ७ चरणको छनोट प्रक्रिया पश्चात स्वतन्त्र निर्णायक मण्डलले उत्कृष्ट पाँचको छनोट गरेका थिए । 

मनोनयमा परेका पाँच जना मध्येबाट एसएमएस र वेबसाइटबाट प्राप्त नागरिकको मत र निर्णायक मण्डलको मतका आधारमा इन्ट्याग्रिटी आइडल २०१७ को छनोट गरिने छ । एसएमएस र वेवसाइटबाट भोटिङका लागि उत्कृष्ट पाँचजनालाई बेग्लाबेग्लै भोटिङ कोड निर्धारण गरिएको छ । कृष्ण धितालका लागि भोटिङ कोड ०१, सबनम पाठकका लागि ०२, सबराज बमका लागि ०३, शेषनारायण पौडेलका लागि ०४ र सृजना तिवारीका लागि ०५ निर्धारण गरिएको छ । भोट गर्नका लागि मोबाईलको म्यासेज बक्समा गएर आइआइएन टाइप गरी स्पेस दिएर आफुलाई चित्त बुझेको ब्यक्तिको भोटिङ कोड लेखि ३४००१ मा पठाउन सकिने छ । त्यसैगरी भोटिङ इन्टरनेटबाट पनि गर्न सकिने छ । त्यसका लागि www.integrityidol.org/countries/nepal/ मा गएर भोट गर्न सकिने छ । भोट गर्ने अवधि मंसिर ११ गते सोमबार देखि सुरु भएर मंसिर २४ गते आइतबार राति १२ बजे सम्म खुल्ला रहने छ ।

इन्ट्याग्रिटी आइडलको महत्व नेपाल सरकारका निजामती कर्मचारीले गरेका सृजनात्मक अभ्यास र उनिहरूले अवलम्बन गरेका सकारात्मक आचरणको कदर गर्दै, नयाँ पुस्तालाई पनि त्यसको अनुशरण गर्न पे्ररीत गर्नु हो । सिंगो संयन्त्र भित्र रहेर काम गर्ने अन्य राष्ट्र सेवक कर्मचारीलाई आफ्नो जिम्मेवारी प्रति पुर्ण जवाफदेही बनाउनुका साथै नागरिक र सरकारबीचको सम्बन्ध विश्वसनीय, सकारात्मक र पारदर्शी बनाउने उद्देश्यका साथ यस  अभियानको थालनी गरिएको  आयोजक संस्था एकाउन्टबिलिटी ल्याबका प्रमुख अधिकारीले जानकारी दिनुभयो । 
--उज्यालोबाट