2 Poush, 2074 | 17 December, 2017 Sunday

तीतोपाटी डट कम - इन्डोनेसियाको बाली द्वीपमा एक ज्वालामुखीबाट विस्फोटका संकेत देखिएपछि उच्चस्तरमा चेतावनी दिइएको छ । सरकारले बाली द्वीपका बासिन्दालाई घर छोडेर जान आदेश दिएको छ।

इन्डोनेसियाली अधिकारीले छिटै ज्वालामुखी विस्फोट हुने खतरा बढेको बताएका छन् । पर्यटकीय द्वीप बालीमा पर्यटकलाई तत्काल बाहिर जान भनिएको छ । साथै बालीस्थित अन्तर्राष्ट्रिय विमानस्थल सोमबारदेखि बन्द गरिएको छ । यसबाट बाली पुगेका हजारौं यात्री अलपत्र अवस्थामा छन्।

ज्वालामुखीको क्षेत्र माउन्ट आगुंगको आसपासको क्षेत्र रहेको छ । उक्त क्षेत्र इन्डोनिसियाकै चर्चित पर्यटकीय क्षेत्र कुटाबाट ७५ किलोमिटर दूरीमा पर्छ । सरकारले स्थानीय बासिन्दा र पर्यटकलाई त्यहाँबाट बाहिर जान चेतावनी दिए पनि यातायातको अभावका कारण भाग्न सकेका छैनन् ।

ज्वालामुखी विशेषज्ञ गेडे साउनतिकाले भने, ‘ज्वालामुखीको चेतावनी उच्चतम स्तरसम्म बढाइएको छ । यहाँ लगातार कम्पन भइरहेको छ ।’ उनले गत मंगलबारदेखि यसका केही संकेत देखिएको पनि जानकारी दिए । सोमबार बिहानै धुवाँ निस्कन थालेको उनले बताए । सोमबारका धुवाँका मुस्ला ३ किलोमिटर ४ सय मिटर उचाइसम्म पुगेको उनको भनाइ छ । राष्ट्रिय विपत्ति नियन्त्रण संस्थाले चेतावनीको स्तर बढाएर उच्चतम स्तर गरेको छ । यसअघि कायम गरिएको प्रभावित क्षेत्र ७.५ किलोमिटर बढाएर १० किलोमिटर पुर्‍याइएको छ ।

आधिकारिक प्रवक्ता सुतोपो पुर्वो नुग्रोहोले जकार्तामा पत्रकार सम्मेलन गर्दै खतराको क्षेत्र बढ्दै गएको बताएका छन् । उनले भने, ‘अहिलेको अवस्थामा २२ वटा गाउँ र करिब ९० हजारदेखि १ लाख मानिस प्रभावित भएका छन् ।’ प्रभावित क्षेत्रबाट ४० हजार मानिस बाहिर गएको उनको भनाइ छ । सोमबार बाली अन्तर्राष्ट्रिय विमानस्थलमा ज्वालामुखीको खरानी पुगेपछि तत्काल बन्द गरिएको हो । विमानस्थलबाट उडान सेवा बन्द भएपछि हजारौं यात्रु विमानस्थल बाहिर जम्मा भएका छन् ।

विमानस्थलका एक प्रवक्ताले करिब ४ सय ४५ उडान रद्द भएको जानकारी दिए । उनका अनुसार विमानस्थल क्षेत्रमा हाल करिब ५९ हजार यात्री अलपत्र परेका छन् । विमानस्थल मंगलबारसम्मका लागि बन्द गरिएको छ । अवस्था हेरी यो बढ्न सक्ने बताइएको छ । प्रति ६ घण्टामा विमानस्थलको समीक्षा गरिने उनीहरूले बताए ।