3 Mangshir, 2074 | 19 November, 2017 Sunday
गजल - लालकाजी श्रेष्ठ
2017-10-04 | तीतोपाटी
गजल
छन् गुनासा के सुनाऊँ वेदना औसत रहेन 
मन मुटु सब हाक्न सक्ने हौसला हिक्मत रहेन

बैँसको मायाँ अचानक केश पाक्दा हात लाग्यो
बस् ! जवानी उम्केको हो प्रेममा मनखत रहेन

दाम दौलत हद कमाएँ कालो धन सेतो बनाएँ
यत्ति हो पीडा स्वयंको नेत्रमा इज्जत रहेन

हाँस्नलाई ठोस कारण आवश्यक पर्थेन केही
कुत्कुती कमसिन हराए शेष उस्तै घत रहेन

टेक्छ लौरोले मलाई हिड्छ आफ्नै हठ नछोडी 
फेरि लौरो टेक्न हुन्थ्यो साथमा ल्याकत रहेन

बोनस शेर -

दैव तेरो द्वार आई माग्नु के चैं अर्को मन्नत 
प्रेयसीको काख पाएँ चाहमा जन्नत रहेन

शब्दार्थ 
----------
कमसिन : कलिलो , अल्लारे
मन्नत : वरदान 
जन्नत : स्वर्ग
© लालकाजी श्रेष्ठ