नेपाली काँग्रेसका सहमहामन्त्री एवम् प्रवक्ता अर्जुननरसिंह केसीले यही साउन १७ गते नेपाली काँग्रेसको नेतृत्वमा सरकार बन्ने र त्यसका लागि नेकपा (एमाले) र संयुक्त मधेसीमोर्चाले सहयोग गर्ने...
नुवाकोट । नेपाली काँग्रेसका सहमहामन्त्री एवम् प्रवक्ता अर्जुननरसिंह केसीले यही साउन १७ गते नेपाली काँग्रेसको नेतृत्वमा सरकार बन्ने र त्यसका लागि नेकपा (एमाले) र संयुक्त मधेसीमोर्चाले सहयोग गर्ने बताउनुभएको छ ।
आज बिहान नुवाकोट सदरमुकाम विदुरस्थित केसी निवासमा प्रेस युनियनले आयोजना गरेको पत्रकार भेटघाटका क्रममा उहाँले सो कुरा बताउनुभएको हो ।
प्रधानमन्त्रीको निर्वाचनमा दुईपटकसम्म तटस्थ बसेका एमाले र मोर्चाले काँग्रेसको समर्थन गर्दै मतदान गर्ने सहमति भएको केसीले बताउनुभयो ।
हाल एकीकृत नेकपा (माओवादी) र नेपाली काँग्रेसबीच सरकारको नेतृत्वका लागि प्रतिस्पर्धा भइरहेको उल्लेख गर्दै उहाँले माओवादी विश्वव्यापी लोकतन्त्रको मूल्यअनुसार निशस्त्र नभएसम्म सहयोग गर्ने एमाले र मोर्चाको संस्थागत निर्णय भएकाले काँग्रेसलाई सहयोग गर्न तयार भएको बताउनुभयो ।
उहाँले मोर्चाभित्रको मधेसी जनअधिकार फोरमले मात्र संस्थागत निर्णय नगरेको उक्त विषयमा माओवादीलाई सहयोग नगर्ने प्रष्ट धारणा राखेको बताउनुभयो ।
